Тываның Баштыңының албан-хүлээлгезин күүседип турар Владислав Ховалыг бо шакта Сүт-Хөл кожууннуң төвү Суг-Аксында ажыл-агыйжы сургакчылаашкын-биле келген.
Республиканың удуртукчузу Хемчик хемни кежир көвүрүгден Суг-Аксы сумузунга чедир автоорук септелгезиниң (3,7 километр) ажылын хынап, танышкан. Ук автомобиль оруунуң септелгези хуусаа езугаар чоруп турар.
“Шедуплинг” хүрээзинге чедип, кожууннуң Камбы-Ламазы-биле, Суг-Аксы сумузунда амыдырал-хандырылга бажыңында ажыл-биле бот-хандыртынган хамаатыларга деткимче көргүзер программа-биле баш таараар, чараштаныр салон, пөс садыы, даараныр болгаш национал хеп даараар цехтер ажыдып алган сайгарлыкчылар-биле Владислав Ховалыг ужуражыр.
Улаштыр “Алдыы-Ишкин” көдээ ажыл-агый бүдүрүлге кооперативинге, Сүт-Хөл кожууннуң төп эмнелгезинге, “Чаңгыс суур – чаңгыс бүдүрүлге” губернатор төлевилелиниң чедиишкинниг киржикчилериниң бирээзи “Баштайгы” көдээ ажыл-агый хереглел кооперативинге, “Саян” көдээ ажыл-агый бүдүрүлге кооперативинге чедип, ажыл-чорудулгазын хынап көрген соонда, кожууннуң активи-биле ужуражып, түңнелдерни үндүрер.
ИА ТуваМедиаГрупп
