Чөөн-Хемчик кожууннуң Хайыркан сумузунда өскүс болгаш ада-иезиниң азыралы чок арткан уругларны чуртталга оран-сава-биле хандырар федералдыг хоойлу езугаар 44 бажыңны тутканын.
Эрткен чылын 37 бажыңны туткаш, кадастр даңзызынче тургускан. Тудуг ажылдарын “Сайзырал” КХН (10 бажың), хуу сайгарлыкчы Эртине Күжүгет (2 бажың), “Атлант” КХН (32 бажың) чорудуп турар. Бо хүнде бажыңнарның иштики-даштыкы ажылдары доозулган, үш кудумчу кудуун тургускан.
Оран-саваны ажыглалче кииреринге нарын айтырыг – чырык четкизинге кожары. Үстунде тудуг организациялары бо айтырыгны шиитпирлээр дээш “Тываэнерго” акционерлиг ниитилелче техниктиг коштурулганы кылыры-биле чагыгны киирген.
“Атлант” КХН-ниң тудуг бригадири Чингис Ховалыгның чугаазы-биле алырга, эрткен чылын 26 бажыңны туткан. “Бо чылын немей алганывыс алды бажыңның тудуу дооступ турары бо. Бажыңнарны сибит деп тудуг материалы-биле кылып турар бис. Ооң кырындан тускай материал-биле чылыглап, соңга, даштыкы эжиктерин тургузуп, шынарлыг кылдыр тудур тур бис. Бо хүнде иштики эжиктерни тургускаш, дужаар бис. Ниитизи-биле алды бригада бар. Бригада бүрүзүнде сес тудугжу ажылдап турар. Колдуунда тус черниң чурттакчыларын ажылче хаара туткан. Бригадавыста печка салыр оолдар база бар” деп ол чугаалап турар.
– 2020 чылда 37 бажыңны тудуп дооскан. Үш кудумчу кудуун тургускан. Тудуг организациялары өөрүнчүг болуушкунну дүргедедири-биле “Тываэнерго” АН-че чырыкты коштурары-биле чагыгларны киирген. Өскүс болгаш ада-иезиниң азыралы чок арткан уругларга чурттаарынга бүгү таарымчалыг байдалды тургускаш бажыңнарының дүлгүүрлерин хүлээдир бис – деп Чөөн-Хемчик кожууннуң чагырга даргазының амыдырал-хандырылга талазы-биле оралакчызы Айдыс Ооржак дыңнатты.
ТуваМедиаГрупп
