Россияда суд приставтарының «Өре-ширеңни билип ал» деп акциязы бо хүннерде эрттип турар. Ооң кол сорулгазы — боттарының өре-ширезиниң бар, чогун билип алырынче кижилерниң кичээнгейин угландырары. Оон аңгыда акцияның сорулгазы — суд приставтар албанының электроннуг хевирде чарлаттынган медээлерин кижилер боттары көрүп, билип, таныжып алырынга дузалажыры. Пристав албанының интернет четкизинде албан ёзу сайтызында тускай арны бар, кижи бүрүзү ынаар киргеш, ат-сывын бижипкеш, бо үеде ооң адында өре-шире бар-чогун көрүп ап болур аргалыг.
Эрткен чылын медээ сагындырыгларны кудумчуларга үлеп, чурттакчы чонну ындыг арга-биле кыйгырып турган болза, бо чылын автомашинада тускай кошкан медеглекчи-биле кудумчуларга халдып, өре-ширезин билип алыр аргалар дугайында чурттакчы чонга чарлап турар.
Ам бо удаада ажылдаар бөлүктүң кежигүннерин көвүдедип, садыг-саарылга черлеринге болгаш найысылал Кызылдың төвүнде хөй улус чыглыр черлерге ажылдакчыларны тургускан. Бөлүк бүрүзү компьютер техниказы-биле четчеленген. Ол-ла черге кижилерге сайттан өре-ширезин айтып бээр болгаш олар боттары амы-хууда сайтче киргеш, билип алырын өөредип каар. Оон аңгыда ук акцияның дугайында допчузу-биле тайылбырлаан бижиктерни чонга үлеп турар.
ТуваМедиаГрупп
