Украинага тускай шериг операциязынга киржип чораан Каң-Демир Лопсан-Комбу-биле Тываның Баштыңы ужурашкан. Шериг операциязының үезинде дайынчы эжин камгалап каанының дугайында «Малахов» телепрограммага көргүскен ооң төөгүзү дыка хөй кижилерни хаара тудупкан. Каң-Демир мөзү-бүдүштүг, хөй сөс чок кижи. Ол болуушкунну кымга-даа чугаалаваан. Даай-авазы Алёна Серен телепрограмма тырттырар деп турарын билип кааш, дыка кайгаанын чугаалаан. Лопсан-Комбу, авазы, дуңмалары – Шагаан-Арыг хоорайның чурттакчылары. Ада-ие улуг оглундан аңгыда, кыстыг, оолдуг. Каң-Демирниң күзели – өртчү болур, ол ышкаш дээди шериг эртем чедип алыр сорулгалыг.
«Каң-Демирге Шагаан-Арыгга ажылды бээринге беленин дыңнадып, дарый шиитпирни үндүргени дээш, ОБЯ-ның Тывада эргелелиниң удуртукчузу А.С. Артёмовка четтиргеним илереттим. Өөредилгезин база шиитпирлептер бис. Чоок кижилериниң чанынга амдыызында күш кирип алырын, чагып чугааладым. Авазының кадыынче сагыш човап турар болду. Аяна Эрес-ооловна беш чыл бурунгаар кылаштавайн барган, ам удавас «Серебрянкага» кадыын быжыктырар деп турар. Тускай эртем-шинчилел институттарынга ханы шинчилгени организастаар даалганы Тываның Кадык камгалал яамызынга бердим. Бар-ла аргаларны ажыглап, экижип келиринге идегээр херек» – деп, Тываның Баштыңы ужуражылга соонда, бодунуң блогунга бижээн.
Улуг-Хем кожуун чагыргазының Лопсан-Комбунуң өг-бүлезинге Шагаан-Арыг хоорайга чаагайжыттынган квартираны бээр дээн шиитпирин Владислав Ховалыг база деткээн. Республиканың Чазаа бистиң үениң маадырын шаңнаар дилег бижикти РФ-тиң Камгалал яамызынче кииргенин ужуражылга үезинде дыңнаткан. Шак-ла ындыг дилегни Каң-Демирниң албан эрттирип турган кезээниң командылалы база киирген. Ол Белгород облазында танкыга удур шериг кезээнге шериг хүлээлгезин эрттирген. А тускай шериг операциязынче керээ чаргаш, киришкени ол.
«Тускай шериг операциязында оолдар, бот-боттарыңарны деткижип, бодуңарны камнап, онча-менди ээп чанып келиңерерни күзедим» – деп, Каң-Демир Лопсан-Комбу ТШО киржикчилеринге чагаан.
Каң-Демир Лопсан-Комбуга база төлептиг оолду кижизиткен ооң ада-иезинге республиканың күрүне шаңналдарын тыпсырын республика баштыңы саналдаан. Чаа чыл бүдүүзүнде Тываның Чазаанга күрүне шаңналдары тыпсыр байырлыг езулалдың чугула кезээнде оларның кайгамчык үлегерлиг чижээн онзагайлап демдеглээр.
