Россияның Онза байдалдар яамызының Тыва Республика талазы-биле Кол эргелелиниң начальниги, иштики албанның генерал-майору Алексей Артёмов Тыва аппарат хуралынга бо хүнде республикада байдалдың дугайында илеткээн.
Тайгаш, сугже дүшкен
Каа-Хем кожуунда июль 25-те ис чок читкен 7 харлыг уругнуң дилээшкинин чорудуп турар. Баш буруңгаар билдингенинден алырга, улуг-хүнде Каа-Хем хемде хаяга турган уруг тайгаш, сугже кээп дүшкен, ооң соонда ону агым аппарган.
Амгы үеде бичии уруг тывылбаан. Айыыл-халап болган черде камгалакчылар дилээшкин ажылдарын чорудуп турар.
Арга-арыг өрттериниң саны өскен
Июль 26-ның байдалы-биле алырга, республиканың девискээринде сес арга-арыг өрттери хып турар: бирээзи Каа-Хем кожуунда, чедизи Тожу кожуунда. Ниитизи-биле 118,4 гектар гектар чер өртке алыскан. 76,9 гектар шөлде хып турган үш өрттү өжүрген, от-биле демиселче 103 кижини хаара туткан.
ИА ТуваМедиаГрупп
