Россия Федерациязының бүгү девискээринде “Мээң-биле кады сагыштаалы” бүгү-российжи ачы-буян төлевилелиниң “Күзелдер шивизи” акциязы 2018 чылдан бээр эгелээн. Амыдыралдың берге байдалдарында кижилерге өөрүшкүнү сөңнеп, Чаа чылдың хуулгаазынын көргүзери – акцияның сорулгазы. Өскүс болгаш ада-иезиниң хайгааралы чок арткан уруглар, кадыкшылы кызыгаарлыг кижилер, хөй ажы-төлдүг болгаш эвээш орулгалыг өг-бүлелерниң ажы-төлү белектерни алыр.
Чаа чыл бүдүүзүнде бистиң республикага база «Күзелдер шивизи» деп акцияны эрттирери чаңчыл апарган.
Декабрь 28-те Тываның Баштыңы Владислав Ховалыг болгаш чазак кежигүннери Чазак бажыңының холлунда тургускан шивиден оолдар, уругларның күзелдерин бижээн «ойнаарактарны» алгаш номчааннар.
Владислав Ховалыгның Чаа чылдың шивизинден алган «ойнаараанда» 11 харлыг Субудай Санчайның Москваже аян-чорук кылыксаан күзелин бижээн.
– Мурнувуста кышкы дыштанылга хүннери болгай. Ынчап кээрге январь дыштанылгазында Субудайның күзелин бүдүрерин кызыдар мен. Ооң ада-иези-биле харылзашкаш, кажан чоруур хүнүн дугуржур бис. Чуртувустуң найысылалын көргеш, ооң амыраары чугаажок — деп, Владислав Ховалыг чугаалаан.
Тываның Чазак Даргазының оралакчызы Александр Брокерт:
– Амыдыралы берге байдалда база кадыы кызыгаарлыг уругларның алыс күзелин бо акция боттандырып турар-дыр. Эрткен чылын Барыын-Хемчик чурттуг спортка сундулуг оолдуң күзели — бажыңга тургузар спортчу комплексти белекке берген мен.
Бо удаада планшет күзеп турар 14 харлыг Алдын-Сай Айыжының күзелин тыртып алдым. Планшеттиң дузазы-биле ол делегей-биле харылзажыр база өөренир аргалыг болур. Шупту уругларның күзелдери бүдүп, өг-бүлелерге кезээде чылыг болгаш таарымчалыг байдал турзун. Кел чыдар Чаа чыл-биле шуптуңарга байыр чедирип тур мен.
Бодум бичиимде хаак күзээр турдум. Чайгы үелерде ажылдааш, боттарывыстың күзелдеривисти боттандырып алыр турдувус. Уруг бүрүзү боду бүгү чүүлдү кылып шыдаар турган болза, ол дег онза чүве кайда боор».
Ол-ла хүн Тыва Республиканың Дээди Хуралының (парламентиниң) фойезинде каастаан «Күзелдер шивизинге» акцияны организастаан.
ТР-ниң Дээди Хуралының Даргазы Каң-оол Даваа баштаан депутаттар «Күзелдер шивизи» акцияга идепкейлиг киришкен.
– Бо буянныг болгаш чараш акцияга каттыжып, шивиде аскан уругларның күзелдерин бижээн ойнаарактарны тыртып тур бис. Чижээлээрге, мен Саглаана Санааның күзелин тыртып алдым. Ооң күзели ноутбук болду. Бөгүн, даарта Саглаананың күзелин албан күүседир мен.
Ынчангаш Чаа чыл уткуштур Саглаанага эки өөредилгени, ада-иезиниң, башкыларының чагыг-сөзүн эки дыңнап, кызымак өөреникчи болурун, ол ышкаш күзелдери кезээде бүдүп чоруурун күзээр-дир мен.
Уругларның күзелдерин боттандырар бо буянныг акция бүгү республиканың хоорай, суурларында ам-даа уламчылап турар.
