Россияның Президентизиниң грантылар фондузунуң бирги конкурузунуң түңнелдерин фондунуң башкарыкчы комитединиң хуралынга Россия Федерациязының Президентизиниң Администрациязының удуртукчузу Сергей Кириенконуң киржилгези-биле тодарадып үндүрген.
Чурттуң шупту регионнарындан 2000 төлевилел конкурстуң тиилекчилери болган. Төлевилелдерни боттандырарын деткииринге ниитизи-биле 4,2 миллиард рубльди үндүрер.
Тыва Республикадан РФ-тиң Президентизиниң Грантылар фондузунуң бирги конкурузунуң тиилекчилериниң аразынче чеди төлевилелдер кирген. Республиканың коммерциялыг эвес ийи культура организациялары боттарының төлевилелдерин боттандырып чорударынга 3 сая рубльди алыр.
“Төөгү-культурлуг эртинелерниң кадагалакчылары” коммерциялыг эвес автономнуг организация Тыва Арат Республиканың тургустунганындан бээр 100 чылынга тураскааткан юбилейлиг делгелгени эрттиреринге деткимчени алыр. Бо төлевилелди февраль айда боттандырып эгелээр, сентябрь айга чедир республиканың сес суурларынга аппарып көргүзер.
Республиканың “Тываларның делегейи” хөй-ниити организациязы “Урянхай-тыва энциклопедияның II тому” эртем-чырыдыышкынныг төлевилелди боттандырарынга деткимчени Россияның Президентизиниң грантылар фондузундан алыр.
“Урянхай-тыва энциклопедияның II тому” төлевилел – “Урянхай-тыва энциклопедияның сөзүглели” болгаш “Урянхай-тыва энциклопедияның I тому” төлевилелдерниң уламчызы. Бо томга алфавиттиң “Л” үжүктен “Я” үжүкке чедир Тываның төөгү, культура, социал харылзаалар, экономика дээш шупту адырларының билиглерин допчузу-биле көргүзер.
Үстүнде айыткан төлевилелдерни боттандырарынга эң шыырак эртемденнерни болгаш эксперттерни хаара туткан. Тываның төөгүзүнге болгаш эртем-билиглеринге кончуг чугула бо төлевилелдер республиканың удуртулгазының улуг деткиишкинин алган.
Тувамедиагрупп
