Бөгүн, май 12-де, бүгү делегей эӊ-не буянныг мергежилдиӊ төлээлери – эмчи сестраларыныӊ хүнүн байырлап турар.
Эмчи сестраларыныӊ ажылы дыка чымыштыг. Хондур, хүнзедир аарыг улусту ажаап карактаар, оларныӊ дөргүл-төлелдери-биле чугаалажыр. COVID-19 хамчыыныӊ үезинде оларныӊ ажыл-ижи улам нарыыдай берген. Кадык камгалал адырынга, эмчи ажылдакчыларынга болгаш бүгү ниитилелге, аргажок аар чүък болган. Эмчи сестралары коронавирус-биле дорт демисежип, боттарыныӊ билиин болгаш арга-дуржулгазын, кижизиг мөзүзүн, шиитпирлиг чоруун көргүскен.
Тывада 3 240 эмчи сестралары ажылдап турарын Красноярскиниӊ статистика албаны 2020 чылдыӊ төнчүзүнде дыӊнаткан. 2015 чыл-биле деӊнээрге, 8,1 хуу азы 244 кижи көвей болган. Оларныӊ 30 хуузу дээди болгаш бирги квалификация категориялыг. 98 эмчи сестралары 10 муӊ кижиге онааштыр хувааттынар (2015 чылда – 95 кижи турган).
Күрүнениӊ болгаш муниципалдыг албан черлеринде медицина ажылдакчыларыныӊ 2020 чылдыӊ январь-декабрь айларда ортумак шалыӊы 46 530,1 рубль болган. Ажылыныӊ тускай байдалдары болгаш чаа коронавирус халдавырын илередиринге болгаш эмнээринге эмчи дуза чедиргени, шак ындыг халдавырлыг аарыглыг улус-биле харылзаалыг ажылдааны дээш, немээр деткимче төлевирлери база ол шалыӊынче кирип турар.
Профессионал байырлалын таварыштыр эмчи сестраларыныӊ буянныг ажыл-ижин, чоннуӊ кадыын камнап кадагалаарынга киирген үлүг-хуузун, онза чедиишкиннерин төлептии-биле үнелеп, изиг байырны чедирбишаан, амыр-тайбыӊ, аас-кежиктиг, быжын кадыкшылдыг болурун күзедивис!
