Тывада эм-таң рецептилерин электроннуг хевирге бижиир системаны киирип турар.
«Кадык камгалалы» национал төлевилелди күүседири-биле, республиканың девискээринге эм-таң рецептилерин электроннуг хевирге бижиир системаны 2023 чылга чедир долузу-биле боттандырары чугула. Ону «Күрүнениң кадык камгалалының информация системазынга даянып, кадык камгалалынга чаңгыс аай чурагайлыг дөзевилелди тургузары» деп регионалдыг төлевилелдиң кызыгаары-биле боттандырар.
Эм-таң рецептизин электроннуг документ хевиринге долдуруп бижииринге эмчи организацияларының, аптекаларның ажылдакчыларын Тываның Кадык камгалал яамызы өөредип турган. Ол ажыл февраль төнчүзүнде доозулган. Республиканың шупту эмнелге албан черлериниң база аптекаларның 34 ажылдакчылары «Электроннуг рецепт» талазы-биле тускай өөредилгени эрткен.
Электроннуг рецептилерни эмнедикчилерге апрельден тура бижип берип эгелээр. А саазынга рецептини эмнедикчилерниң күзели-биле бижип берип болур. Баштай чиигелделиг эм-таң алырынга электроннуг рецептилерни бижип бергеш, ол ажыл-чорудулганы шенеп хынаар деп турар.
Тывага электроннуг рецепт алыр схема көңгүс бөдүүн болур. Эмчи документини электроннуг хевирге бижээш, Регионнуң медицина информациязының автоматчыткан системазынга бодунуң компьютерин таварыштыр киирип каар. Эмчиниң бижип берген эмнерин аптека албан черинге ол система боду дамчыдып бээр. Чиигелделиг эм алыр эмнедикчи аптекага баргаш, бодунуң паспортун болгаш СНИЛС документизин көргүзер. Аптеканың ажылдакчызы автоматчыткан система таварыштыр эмчиниң бижип берген эмнерин көргещ, эмнедикчиге ол эм-таңны ап бээр.
Эмчиниң, эмнедикчиниң болгаш фармацевтиң харылзаалыг ажыл-чорудулгазының ажыктыг чепсээ дээрге электроннуг рецептилерниң чаа системазы болур.
ТуваМедиаГрупп
