“Спорт – чуртталганың чаңчылы” төлевилел-биле Тываның найысылалынга күш-культура-кадыкшылга комплекстерин тудар.
Тыва Республика «Демография» национал төлевилелдиң “Спорт – чуртталганың чаңчылы” төлевилел күүселдезиниң 2019 чылдан бээр идепкейлиг киржикчизи. Республиканың спортчу инфраструктура хөгжүлдезинче 2021 чылда 33 ажыг сая рубль көрдүнген, ону аңгы-аңгы хар-назылыг кижилерни база көдээ чурттакчыларны спортчу белеткелдер хемчеглеринче хаара тудар.
Төлевилел республиканың олимпийжи курлавырлар спортчу школаларынга: чырып турар медээлер электроннуг таблоларны, самбыраларны, аар атлетика штангаларын, белеткенир кижи дүрзүлерин, универсалдыг бичежек тренажерларны, туттунуп үнер канаттарны, татами, 16, 24 баз 32 килдиң спортчу шойларын, бут база хол бөмбүктерин, бокс шоодайларын, рингилерни саткан. Бо бүгү спортчу дериг-херекселдерже 10 сая рубль ажыг рубльди үндүрген.
Бо чылдың сентябрьда Бии-Хем биле Тожу кожууннарга күш-ажылга болгаш камгалалга белен болурунуң шөлдерин эптеп тургузуптарга, арыг агаарга күш-дамыр мергежилгелерин кылыр арга бар апаар. Ол шөлдерже 2,5 млн рубль көрдүнген.
Республика найысылалының спортчу инфраструктуразынче онза кичээнгей угланган. «Спутник» чаа микрорайонга ажык күш-культура-кадыкшылга комплекизин ажыдар. Комплексте бут болгаш хол бөмбүү ойнаар черлер, маңнаар оруктар, агаарга белеткенир шөлчүгештер база дериглер бар. Бут бөмбүүнүң шөлү кышкы үеде хоккей чуңгузу апаар.
“Спорт – чуртталганың чаңчылы” федералдыг төлевилел 2019 чылдың январь 1-де ажылын эгелээнин сагындыраал. Ол «Демография» нацтөлевилелдиң кезээ болур. “Спорт – чуртталганың чаңчылы” төлевилелдиң сорулгазы – күш-культура болгаш спортка сонуургалдыг российжилерниң санын 2030 чылга чедир 70 хуу чедир көвүдедири.
ИА ТуваМедиаГрупп
