Эрткен дыштаныр хүннерде Тес-Хем кожуунда О. Седен-оол аттыг спорт школага болгаш Шуурмак ортумак школаның спорт залынга Тываның шыырак спортчуларының бирээзи чораан Аяс Күнзектиң чырык адынга тураскааткан хол бөмбүүнге маргылдаа эр улустарның командаларының аразынга болуп эрткен.
Республика чергелиг улуг маргылдаага кожууннардан болгаш найысылал Кызыл хоорайдан ниитизи-биле 36 команданың кежигүннери 378 спортчу киришкен. Чидиг демиселдиң түңнелинде Сүт-Хөл кожууннуң Ишкин сумудан команда бирги черни чаалап алган. Ийиги черни республиканың Онза байдалдар яамызының командазы, үшкү черни арга-арыг камгалалының авиаотрядының командазы ээлээннер.
Маргылдаа үезинде сайзыраңгай спортчу мергежилдиин, чараш оюнну көргүскен спортчуларга тускай шаңналдарны база тывыскан. “Эң дээре камгалакчы” деп шаңналды Онза байдалдар яамызының командазының кежигүнү Сылдыс Түлүш биле арга-арыг камгалалының авиаотрядындан Буянды Алдын-Даш оларга тывыскан. “Эң дээре дамчыдыкчы ойнакчы” шаңналды Ишкин командазының ойнакчызы Саадак Сатка, “Эң дээре халдакчы” шаңналды Таңды кожуундан Чимит Даваага тывыскан.
Тываның шыырак спортчуларының бирээзи чораан Аяс Александрович Күнзектиң чырык адынга тураскааткан хол бөмбүүнге маргылдааны организастап эрттиреринге улуг дузазы дээш О.Седен-оол аттыг спорт школазының директору Самет Чимбиянга болгаш Шуурмак ортумак школазының директору Мира Уржукка, маргылдаага кожууннардан болгаш Кызыл хоорайдан киржип келген спортчуларның чемненилгезин болгаш дыштанылгазын организастааны, Тес-Хем кожуунга спорту сайзырадырынга киирип чоруур көскү үлүг-хуузу дээш Отчугаш Соянга улуу-биле өөрүп четтиргенин маргылдааның киржикчилери болгаш организакчылары илереткен.
ТуваМедиаГрупп
