Тываның көдээ ажыл-агый болгаш аъш-чем яамызының медээлери-биле алырга, губернатор төлевилелдериниң киржикчилериниң коданнарында мал оолдаашкыны кидин түлүк.
“Аныяк өг-бүлеге – кыштаг” губернатор төлевилелиниң киржикчилери мал оолдаашкынын чедиишкинниг чорудуп турар. Оларның коданнарында хой-өшкүнүң 75 хуузу төрээн, 37602 анай-хураган онча-менди доругуп турар.
Сүт-Хөл кожууннуң аныяк “кыштагжыларында” 3885 баш анай-хураган төрүттүнген (планнаттынганындан 119 хуу), Мөңгүн-Тайга кожуунда – 1832 баш (планнаттынганындан 108 хуу), Тере-Хөлде – 1224 баш (планнаттынганындан 89 хуу). “Кыштагжыларның” аразындан тере-хөлчүлерде 73 бызаа төрүттүнген (планның 75 хуузу), каа-хемчилерде –189 бызаа (планның 56 хуузу), улуг-хемчилерде 65 баш (планның 48 хуузу).
“Чаа сорук” губернатор төлевилелиниң 2021 чылда киржикчилери 10400 хой-өшкүден 7800 анай-хураганны алырын планнаан. 6369 анай-хураган төрүттүнгеш (планның 82 хуузу), бо хүннерде онча-менди доругуп турарлар. Бай-Тайга кожууннуң “сорукчуларының” коданнарында – 675 баш, Тес-Хемде – 635, Барыын-Хемчикте – 981 баш анай-хураган төрүттүнген.
“Чаа сорукчуларның” коданнарында 119 бызаа төрүттүнген, оларның күш-шыдалы эки.
Мал-маганнның сула эдержилгезин болдурбазы-биле малчыннарның коданнарында турар бүдүрүкчү кошкарларны болгаш хуналарны аңгы коданнарга чыыр ажылды дарый доозарын Сүт-Хөл, Барыын-Хемчик, Кызыл болгаш Улуг-Хем кожууннарның удуртукчуларынга республиканың Көдээ ажыл-агый яамызының специалистери сагындырган. Каа-Хем, Таңды, Чеди-Хөл, Бии-Хем кожууннарга бир коданга-ла 150 баш бүдүрүкчү кошкарлар болгаш хуналар турар тускай коданнарны тургузарын база сүмелээн.
Төрүүр шээр болгаш бода малдарның оолдаашкынының үезинде көдээ ажыл-агый яамызының тускай эртемниг специалистери малчыннарның кыштагларынга доктаамал ээлчежип барып турарлар. Улуг кичээнгейни “Аныяк өг-бүлеге – кыштаг”, “Чаа сорук” губернатор төлевилелдерниң киржикчилериниң коданнарында мал оолдаашкынынче салган.
Малдың халдавырлыг аарыгларынга удур тарылга ажылдарын чорударынче база шыңгыы кичээнгейни угландырган.
ТуваМедиаГрупп
