2021 чылда Каа-Хем кожуунга “Хууда дузалал ажыл-агыйы” угланыышкын-биле 30 өг-бүле 100 муң рубль хемчээлдиг деткимчени социал керээ-биле алган. Оларның хөй нуруузу алган дузаламчы акшазын хаван ажаап-тударынга ажыглаан. Төрүүр дагаалар, бода мал, харын-даа индюктар садып алган хамаатылар база бар.
Ол өг-бүлелер кышка ыяк белеткенип, мал чиир сиген-ширбиилди четчири-биле курлавырлап алганнар.
Игорь биле Оксана Дамдый-оолдарның өг-бүлези бо чылын Каа-Хем кожууннуң Чонну ажылга хаара тудар төвү-биле социал керээни “Хууда дузалал ажыл-агыйын хөгжүдери” угланыышкын-биле чарган.
Ук өг-бүле дузаламчы акшазы-биле хаваннарны болгаш индюктарны, а ол ышкаш мал чемин, витаминнерни садып алган. Оксана Сандыевнаның чугаалап турары-биле алырга, күрүнеден ук дуза чединмес хамаатыларга боттарының материалдыг байдалын экижидип алырынга тулган дээн арга-шинек болуп турар.
ИА ТуваМедиаГрупп
