Чөөн-Хемчик кожууннуң көдээ ажыл-агый эргелелиниң даргазы Алдандай Ооржак-биле май 10-да Теве-Хая, Баян-Тала, Ийме, Сесеге, Ак-Шат, Ак-Хая девискээрлеринде часкы хову ажылдарын база “Чаа сорук” төлевилелдиң киржикчилериниң ажыл-чорудулгазын хынавышаан, картофель үрезинин чедирер үнүүшкүнге чордувус.
Теве-Хаяның Чолдак-Хову аксында “Чаа сорук” төлевилелдиң 2021 чылда киржикчизи Владислав Ховалыг кажаазының ханазын чонуп, бедидир кыла берген. Теве-Хая сумузунуң чанында тараа тарыыр, ногаа өстүрер шөлүнде Чаян Донгак тараазын дүүн-не тарып эгелээн. Дуңмалары, честези, чоок кижилери-биле ол чылдың-на чаагай тараа болгаш ногаа дүжүдүн ажаап ап чаңчыга берген.
Баян-Тала таварааш, Ийме сумузунга Көк-Терек бугазының ашталгазын чорудуп турар оолдарга ужураштывыс. Экскаватору үрелген, артык кезекти эккээрге кылып алдылар.
“Социал картофель” программазынга киржир 12 өг-бүлеге картофель үрезиннерин чедирип, чагырганың эжииниң чадазынга дүжүрдүвүс. Картофель тарыыр дээн өг-бүлелер тускай даңзыга аттарын салгаш, картофельди ап эгелээн.
Сесегеде “Чаа сорук” төлевилелдиң киржикчизи кажаазының ыяштарын чонуп доозуп турар.
Баян-Тала девискээринде Ак-Шаттың Инек-Кудуруу артында Ромеш Ондар удурткан эрлер үш “Беларусь” трактор, анаа ийи кожуг тележкалыг, тараа чаштырыкчыларлыг, “Газ 53” чүък машиназы-биле 10 ажыг гектар черде кызыл-тас үрезинин эккеп алган, куруккан черде черин чардырбышаан, тараазын чажып турлар. Чоокку чылдарда үстүнде айытканым Теве-Хаяда Чаян Донгактың база Баян-Таланың Ромеш Ондарның удурткан бригадалары дег, ынчаар ажылдап турар тараажылар көрбээн мен.
Чаян Донгактың трактору, тараа чаштырыкчызы эргижирей берген, а Баян-Талада бир трактор чаа үении, ийизи эрткен чылдарныы, тараа чаштырыкчылары сеялкалар үрелип турар, ынчалза-даа олар түр бергедээшкинннерни ажып эртип, тараа чаштырыкчызының септелгезин хензиг када өйлеп, эдип алгаш, бо хонуктарда доозарын, эртен сула чаштырарын чугааладылар.
“Часкы хүн – чылды чемгерер” деп үлегер домакта ышкаш, чаагай дүжүттү ажаап алырының магадылалы оларда бар-дыр.
Улаштыр Хайыракан девискээринде Ак-Хая, Куу-Даг баарында кыштагларга, кошкар кадарчызының турлаанга чорааш, “Чаа сорук” төлевилелдиң киржикчизиниң кыштааның орнун таварааш, Чадаанага чанып келдивис. Ажыл кайда-даа хайныышкынныг боттанып турар деп түңнедим.
ТуваМедиаГрупп
