Тываның Баштыңының албан-хүлээлгезин күүседип турар Владислав Ховалыгның Тыва Республиканың хүнү болгаш ТАР-ның 100 чыл ою-биле чаңгыс чер-чурттугларынга байыр чедириишкини.
– Республика хүнү бо чылын онзагай, Тыва Арат Республиканың тургустунган хүнүнден бээр 100 чылы-биле кады ону демдеглеп эрттирип турар бис. Таптыг-ла чүс чыл бурунгаар – 1921 чылдың ортаа үезинде бистиң чонувустуң салым-чолунга төөгүлүг салдарлыг болуушкуннарның бирээзи болган – Азияның чиге төвүнге бот-догуннаан күрүне тыптып келген.
Бо онзагай болуушкун Тываның Россия-биле кады хөгжүлдезиниң эгезин салган. Херек кырында көскү чедиишкиннер-биле Тыва бөгүн бодунуң юбилейин уткуп турар. Улуг хемчээлдиг төлевилелдерни чедиишкинниг боттандырар, чугула социал сорулгаларны шиитпирлээр талазы-биле ажыл регионда чоруп турар. Республикада амгы үениң инфраструктуразы тургустунуп, чаа уруглар садтары, школалар болгаш эмнелгелер ажыттынып турары кончуг чугула. Культура болгаш туризмниң сайзыраарынга, хамыктың мурнунда кижилерниң чаагай чоруунга хөй чүүлдер кылдынып турар. Чедиишкин бүрүзү – төрээн республиказынга ынак, ооң чаагай чоруу дээш ажылдап чоруур, ол сайзыразын дээш шупту чүүлдерни кылып турар муң-муң кижилерниң салым-чаяаны, энергиязы болгаш тура-соруу-дур.
Ол төөгүлүг болуушкуннарның киржикчилери ынчангы үениң кижилеринге кайы хире улуг болгаш бөдүүн эвес салым-чол таварышканын бо-ла бодаар-дыр мен!
Бодунуң төрээн чуртунуң тургустунарынга болгаш хөгжүүрүнге көскү үлүүн киирген тыва чоннуң шупту салгалдарынга өөрүп четтиргенивисти илередип чоруур бис!
Боттарывыстың уруг-дарыывыска болгаш уйнуктарывыска улам чечектелип сайзыраан Тываны дамчыдып бээр ужурлуг бис. Чаагайжыттынган хоорайларны болгаш суурларны, арыг хемнерни болгаш арга-арыгны, төрээн дылывысты болгаш эрте-бурунгудан бээр культуравысты. Улам бедик чедиишкиннерни чедип алыр дээш, билектеривис сывыртыныпкаш ажылдаар ужурлуг бис.
100 чыл – дидим болгаш күштүг тура-соруктуг чаартылгаларның чүгле эгези-дир. Төрээн Тывавыска хөгжүлдени болгаш чечектелиишкини, шупту чаңгыс чер-чуртугларымга быжыг кадыкшылды, ажылга болгаш чуртталгага чедиишкиннерни, бүгүдеге буян-кежикти күзедим.
ИА ТуваМедиаГрупп
