Россияның Президентизи Владимир Путин Россия Федерациязының Чазаанга болгаш Күрүне Думазынга өскүс уругларга бажыңнарны көвүдедир тударының айтырыын регионнарның күүседикчи эрге-чагыргалары-биле кады сайгарып көөр даалганы берген. Бир эвес чугула херек болза, өскүс уругларны чуртталга шөлү-биле хандырарын мурнады шиитпирлээр аргаларны бээр өскерилгелерни хоойлужудулгага киирип болурун база сүмелээн.
Ажы-төлүн чааскаан азырап өстүрүп чоруур иеге азы адага күрүнеден немелде деткимче көргүзериниң айтырыын сайгарып көөр даалганы база российжи күрүнениң баштыңы Россияның Чазаа биле Күрүне Думазынга берген.
Президент В. Путинниң бо даалгалары 2021 чылдың май 15-ке чедир күүсеттинген турар ужурлуг. Чүге дээрге Күрүне Думазының депутаттарының фракцияларының удуртукчулары-биле 2021 чылдың февраль 17-де Президент ужурашкан түңнелинде, хүлээп алган даалгаларның санынче өскүс уругларга бажыңнарны көвүдедир тудары болгаш ажы-төлүн чааскаан азырап өстүрүп чоруур иеге азы адага күрүнеден немелде деткимче көргүзери база кирген.
Россияның Президентизиниң бо даалгаларының кол сорулгазы – социал камгалалы кошкак бооп турар российжи хамаатыларның амыдырал-чуртталгазының байдалын элээн экижидери.
ТуваМедиаГрупп
