Коронавирустуң хамчыын ужун социал-экономиктиг адыр качыгдап турар. Ооң-биле холбаштыр уругларга ээлчеглиг акша төлээшкиннерин Президент Путин баш буруңгаар чарлаан.
Бо удаада өг-бүледе өөреникчилерге 10-10 муң рубльди төлээр. Ол дээрге, чугаажок-ла, чаа өөредилге чылының эгезинде тулган дээн деткимче-дир. Ынчалзажок, россий практиканың көргүзүп турары-биле алырга, чамдыкта ук төлевирлер бодунуң алыс утказынга чарыгдаттынмайн баргылаар. Статистикадан көөрге, чогум-на ындыг төлээшкинннерниң үе-чадазынга эзиртир ижип алгаш, бажыңга кем-херек үүлгедиишкиннериниң саны көвүдээр.
– Эң-не кол чүүл – ук төлевирлерниң алыкчызынга дорт четкен турары деп чүүл-биле чөпшээрежир боор силер. Улуг кижилер ук акшалар оларга эвес, а уругларны ажаап-тежээринге көрдүнген дээрзин билзе чогуур. Ынчалза-даа бис кударанчыг дуржулганы көрген-не болгай бис: ада-иелер акшаларны алгаш, арагалап эгелээр, түңнелинде социал айыылдыг байдалга арткан уруглар качыгдаар – деп, социал ажылдакчылар тайылбырлап турарлар.
Ындыг багай уржуктуг чаңчыл бүдүн Россияда демдеглеттинип турар. Ынчангаш бо хүннерде хамаатыларга ук төлевирлерни арага-дарыга база таакпыга чарыгдаарын хоруп турар хоойлу төлевилелин Күрүне Думазынга саналдаан.
Чарыгдалдарны электроннуг саннарның дузазы-биле хынаарын саналдап турар, оларның ачызында бүгү садыгланыышкынны эдерти хайгаарап болур. Депутаттарның үзел-бодалы-биле алырга, шак ынчалдыр уруларның эргелери болгаш эрге-ажыктары камгалаттынар.
Кызылдың чагырга черинде ук саналды чөптүг деп көрүп турар.
– Ол дээрге хөлчок нарын тема-дыр. Хоойлу төлевилелин деткип турар-даа болзувусса, ону сайгарып, чугаалажып турар үеде боттуң оруун эдергени дээре деп шиитпирледивис. Ынчангаш, 2021 чылдың август 2-ден тура дөмей эвес байдалдар тургустунуп болгу дег даңзыда турар өг-бүлелерге рейдилерни чорудуп, оларга хамаарыштыр аңгы-башкы ажылдап эгелээр бис – деп, Кызылдың мэриязының социал хөгжүлде эргелелиниң специалистери чугаалап турарлар.
Кызылда социал айыылдыг байдалда турар 162 өг-бүле даңзыда турар. Хөй уруг-дарыглыг болгаш чединмес өг-бүлелерниң саны 1000 бичии ажыг.
Рейд бөлүктери пособиеге садып алган школачы дериг-херекселдерниң, ном-дептерлерниң бар-чогун ылавылап хынаар.
ИА ТуваМедиаГрупп
