Эрткен дыштаныр хүннерде Тываның хоорай, суурларының чурттакчылары, албан черлериниң ажылдакчылары чурттап база ажылдап турары девискээрин аштаары-биле субботникче үнгеннер. Ооң мурнунда субботниктерге деңнээрге, бо удаада ооң киржикчилери хөй болган.
Тес-Хем кожууннуң төвү Самагалдай суурнуң К. Баазан-оол аттыг көдээ культура бажыңының чогаадыкчы коллективи чараш агаар-бойдустуг Калдак-Хамар арттың кырында эрткен-дүшкен чорумалдар доктаап дыштаныр девискээрни боктан аштап арыглаан. Арт кырында ыяштарда баглап каан кадактарны дүжүрген, чүге дээрге улуг ыяштарның будуктарынга, чаш ыяштарның уннарынга баглаан кадактар оларның өзеринге шаптыктап, кургап кадарынга салдарлыг.
Тес-Хем кожуунга субботниктер чүгле суурларга эвес, малчыннарның аалдарынlа база эрттип турар. “Чаа сорук” губернатор төлевилелиниң киржикчилериниң бирээзиниң Кызыл-Чыраа деп черде кыштаанга кожууннуң идепкейлиг чурттакчылары субботникти эрттирип, хой кажаазының көржеңин коптарып, аалдың девискээрин мал-маган өдээнден аштаан.
Улуг-Хем кожууннуң төвү Шагаан-Арыг хоорайга эрткен субботникке бичии уругларның спорт школазының, “Ручеек”, “Сказка”, “Челээш” уруглар садтарының, күш-ажыл болгаш социал хөгжүлде эргелелиниң, “Россияның почтазы” харылзаа чериниң дээш өске-даа албан черлериниң ажылдакчылары боттарының ажылдап турары организацияларының девискээрин болгаш чоок кавызын боктан аштаан.
Бии-Хем кожууннуң төвү Туранның барык шупту албан черлериниң ажылдакчылары чурттап турары хоорайын боктан аштаар, бичии уруглар шөлдеринде оюннар дериг-херекселин хир болгаш ыштан арыглаар ажылды идепкейлиг чорутканнар. Чижээлерге, Туран хоорайның № 2 ортумак школазының улуг класстарының өөреникчилери Юрий Гагарин аттыг дыштанылга сесерлиинде бичии уруглар ойнаар шөлдүң дериг-херекселдерин чуп каапканнар.
Тыва Республиканың националдар херектериниң талазы-биле агентилелдиң болгаш Орус культура төвүнүң ажылдакчылары Юрий Гагаринге тураскаал турар черниң болгаш Орус культура төвүнүң девискээрин аштап арыглаан.
Тываның хоорай, суурлары улам арыг, аянныг апарган. Субботниктер ам-даа уламчылаар.
ТуваМедиаГрупп
