Россия Федерациязының Президентизи Владимир Путин Федералдыг хуралга бо чылгы Айыткалынга амыдырал-чуртталгазы берге байдалдыг өг-бүлелерге күрүнеден социал деткимчени улам күштелдирерин айыткан.
Адазы азы авазы ажы-төлүн чааскаан азырап өстүрүп чоруур өг-бүлелерге социал дузаның немелде хемчеглерин 2021 чылдың июль 1-ге чедир хуусаада ажылдап кылырын Владимир Путин Россия Федерациязының Чазаанга дааскан.
Россияның Президентизиниң бо даалгазы ёзугаар алырга, 8-тен 16 хар чедир уругларлыг долу эвес өг-бүлелерге азы ада-иези чарылган, оларның кайы бирээзи уругларын чааскаан азырап өстүрүп чоруур өг-бүлелерге ай санында 5650 рубль пособия акшазын төлеп берип болур апаар.
Президентиниң Айыткалында бир онзагай даалга – өөреникчи бүрүзүнге чаңгыс удааның 10 муң рубль хемчээлдиг төлевирни бээри. Күрүнеден бо дузаламчыны 2021 чылда школаже өөренип кирер бирги класстың өөреникчилери база ап болур.
Амыдырал-чуртталгазының байдалды берге сааттыг херээжен иелерни Владимир Путинниң кичээнгейи оя бербээн. Саатталы бергеш, эмчи хайгааралынга туруп алган аваларга ай санында 6350 рубль дузаламчы күрүнеден бээрин Президент айыткан.
Федералдыг хуралга Президент Владимир Путинниң бо чылгы Айыткалында социал айтырыглар блогу күштелгенин эксперттер демдеглеп, ол 2021 чылда сентябрь 19-та Күрүне Думазының депутаттарының соңгулдалары-биле холбаалыг чадавас деп догааштырып турар.
ТуваМедиаГрупп
