Бөгүн, апрель 22-де, Тыва Республиканың Бүгү-российжи уруглар болгаш элээдилерниң шериг-патриотчу “ЮНАРМИЯ” хөй-ниити шимчээшкининиң тургустунганындан бээр 5 чыл оюнга тураскааткан республика чергелиг автомашиналар чарыжының ажыдыышкынын байырлыг хевирге эрттирген. Аңаа Кызыл хоорайның школаларының аныяк армейжилери идепкейлиг киржип, чараш көргүзүглерни чыылганнарга бараалгаткан.
Автомашиналар чарыжырын ТАР-ның 100 чылдаанынга тураскаадып эрттирип турар. Авточарыштың старды Кызыл хоорайның Тиилелге шөлүнден эгелээш, ийи угланыышкынныг Бии-Хем болгаш Улуг-Хем кожууннарже углуг чоруп каар.
Автоколоннаны тускай сорулгалыг “ТИГР-М” деп 2 автомашина баштап алгаш үнүпкен. Кожууннарга авточарыштың киржикчилери-биле школачыларга болгаш аныяктарга патриотчу кижизидилгелиг шөлдерни организастаар.
Үнүүшкүннүг бо хемчег кожууннарга ниитизи-биле 500 хире элээдилерни болгаш аныяктарны хаара тудар.
ТуваМедиаГрупп
