НовостиОбщество

Эвилең хүлүмзүрүг чайынналып турзун

Россияның Кеземче күүселдезиниң федералдыг албанының Тыва Республикада эргелелинге хоругдал черинде ажылдап чоруур чаңгыс эвес салгалдың офицерлерин кижизидип, оларның дагдыныкчызы болуп, ам-даа мурнуку шугумда ажылдап чоруур хоочунга мугур чылдаан ою-биле байыр чедирип демдеглээн. Ол дугайында ук черниң парлалга албаны дыңнадып турар.

Сезен чыл буруңгаар Эрзин кожууннуң Нарын суурунга бистиң коллегавыс, эживис болгаш дагдыныкчывыс Борбак-оол Аракчаевич Узум төрүттүнген.

Ооң 53 чыл күш-ажылчы допчу намдарының 33 чылы кеземче-күүселде системазынга янзы-бүрү албан-дужаалдарга эрткен.
Чылдар аайы-биле ооң допчу намадарынче ханылаарга, Борбак-оол Аракчаевичиниң салым-чолу адышта дег көстүп келир. Эрзин ортумак школазын дооскаш, Польшага үш чылдың дургузунда шериг албан-хүлээлгезин эрттирген. Чуртунче ээп чедип келгеш, республика ИХЯ-зының Тес-Хем районда күрүне хайгааралының инспекторунга томуйлаткан.

Тываның иштики херектер сайыды Алдын-оол Оюннуң дагдынылгазы-биле 1967 чылда ону Москваже, ССРЭ-ниң ИХЯ-зының Дээди школазынче өөредип чоруткан, аңаа баргаш, ол кеземче күүселдезин чорудар албан черлериниң ажыл-чорудулгазын өөренип турган. Төрээн черинче ээп кээрге, 1970 чылда ону №2 эдип-чазаар колонияның отряд начальнигинге томуйлаан, ооң соонда оперкилдистиң начальнигиниң албан-дужаалынга, элээн болганда №2 эдип-чазаар колонияның начальнигиниң оралакчызынга, а 1974 чылда Борбак-оол Аракчаевич №1 эдип-чазаар колонияның начальнигинге томуйлаткан.

Аңаа ийи хире чыл ажылдап чорааш, Тываның иштики херектер сайыдының адынга ССРЭ-ниң ИХЯ-зының Академиязынче ону өөредип чоргузарының дугайында билдириишкинни киирген. Ону доозуп алырга, 1979 чылда Тыва АССР-ниң ИХЯ-зының эдип-чазаар албан черлериниң килдис начальнигиниң оралакчызынга томуйлаан, ам болза, Россияның Кеземче күүселдезиниң федералдыг албанының Тыва Республикада эргелели ол.

Ук албан-дужаалга 12 чыл бараан болуп чорааш, 1991 чылда эргелел начальнигинге томуйлаткан. Аңаа ол 2003 чылга чедир ажылдааш, суспаранчыг үелерде албан чериниң ажылын бедик деңнелге тудуп шыдаан.

Албан-хүлээлгелерин доозупса-даа, Борбак-оол Аракчаевич эдип-чазалга системазын каап шыдаваан. Бо хүннерде ол кадрлар эргелелинде салбыр аналитиги, Россияның Кеземче күүселдезиниң федералдыг албанының Тыва Республикада эргелелинде Хоочуннар чөвүлелиниң даргазы.

Он-он чылдар эрткен, ажылдап келгени эртен бүрүзүнде Борбак-оол Аракчаевич өрээл бүрүзүн бакылап, “Экии-экии, мээң эргимнерим!” деп мендилежирге, олурган улустуң арын-шырайынга эвилең хүлүмзүрүг чайгаар-ла чайынналы бээр.

ТуваМедиаГрупп

Похожие записи

Новости

Популярные записи