Каа-Хем кожууннуң чагыргазының ажылдакчылары Дерзиг-Аксы сумузунда «Сорунза» төлевилели-биле туттунуп турар көдээ культура бажыңының тудуунга үлүүн киириштирген.
Ажылчын бөлүктүң эр кижилери көдээ культура бажыңының девискээрин долгандыр херимнээн. Херээжен улус тудугжуларга болгаш культура эргелелиниң ажылдакчыларынга амданныг изиг чемни белеткеп берген.
Өвүр кожууннуң Дус-Даг, Каа-Хем кожууннуң Эржей база Дерзиг-Аксы, Барыын-Хемчик кожууннуң Бижиктиг-Хая, Бай-Тайга кожууннуң Кара-Хөл, Таңды кожууннуң Кызыл-Арыг, Сүт-Хөл кожууннуң Кызыл-Тайга сумуларынга 243 дөрбелчин метр шөлдүг, 120 олуттуг культура одагларын бо чылын тудуп доозар.
ИА ТуваМедиаГрупп
