Тываның Баштыңының албан-хүлээлгезин күүседип турар Владислав Ховалыг Кызыл хоорайда чаа туттунуп турар тудугларга барып, ажылын хынап көрген.
Найысылалдың мурнуу чүгүнде Спутник микрорайоннуң соңгу талазынга сөөлгү үеде хөй квартиралыг 5-6 каът бажыңнарны элээн хөйнү туткан. Амгы үеде Спутник найысылалдың элээн сайзыраңгай микрорайоннарының бирээзи апар чыдар. Ында улуг делгем школа, уруглар садтары дээш социал ужур-дузалыг албан черлери бар.
Ооң соңгу талазында күштүг электри энергиязының шугуму болгаш чылыдылга четкизиниң чер кырында кол хоолайы-биле холбаштыр хөй каът чаа бажыңнарның девискээрин тодарадырынга нарын айтырыглар турза-даа, Спутникте чуртталга болгаш социал тудугларны тудары уламчылап турар.
Бо микрорайоннуң Полигонная кудумчуда хөй квартиралыг каът бажыңнарны болгаш уруглар садтарын кандыг шынарлыг тудуп турары-биле Владислав Ховалыг таныжып, тудуг объектилерин өй-шаанда тудуп доозарынга болгаш ажыглалга кииреринге шаптыктыг хире апаар айтырыгларны тудуг организацияларының удуртукчулары-биле сайгарып чугаалашкан.
Нарын айтырыгларның бирээзи – тус черниң чурттакчыларының аразында дашчы тудугжуларның республикада эвээ¬жи. Өске республикалардан тудугжулар хөлезилеп алыр дээрге, коронавирус-биле холбаалыг кызыгаар-лаашкыннар шаптыктаан. Нарын айтырыг¬лар амгы үеде бар-даа болза, туттунуп турар бажыңнарны бо чылын ажыглалга кии¬рерин тудугжуларның удуртукчулары магадылаан.
Тудуг ажылдары шаптараазыннар чок чоруп турар деп демдеглээри арай-ла ындыг. Тудугларның төлевилелин тудугжуларга озалдадыр бергени, акшаландырыышкынның орайтааны дээш өске-даа айтырыглар турган болгаш ам-даа бар. Чижээлээрге, кылдынган ажылдары дээш акшаны “Мегастрой” тудуг организациязы амга чедир албааны.
“Мегастрой” 27 дугаар уруглар садының бажыңын тудуп үндүрүп, ооң шеверлел ажылдарын чорудуп турар. Ынчалзажок оран-саваның агаар арыглаар системазының болгаш өртке удур медээ дериг-херекселдерин амга чедир тудуг объектизинде эккелбээни илерээн.
Уруглар садының тудуун чорудуп турар “Мегастрой” тудуг организациязының директорунуң оралакчызы Марукиян ол дериг-херекселдерни Москвадан дарый садып алыр болгаш сөөртүп эккээр талазы-биле хемчеглерни ап чорудуп турарын, оларны эптээр ажылдарны дүрген кылырын Владислав Ховалыгга дыңнаткан. Уруглар садын Кызыл хоорайның чылыг болгаш изиг-соок суг системазынга кожарынга белеткээрин, оран-саваның бодун ажыглалга бүрүнү-биле, орай-ла дизе, октябрь ортаа үезинде дужаарын “Мегастрой”-нуң удуртулгазы Владислав Ховалыгга аазаан.
Уланчызын №59 “Шын” солундан номчуп болур.
