«Чурттаарынга таарымчалыг хоорай хүрээлеңин хевирлээри» регионалдыг төлевилелдиң бадылаашкыны доостурунга чедир каш-ла хонук арткан. Эрзин кожуундан ниитизи-биле 12 төлевилел киржип турар.
Кожууннуң төвү Эрзин болгаш Нарын, Бай-Даг, Мөрен, ниитизи-биле дөрт суур бо төлевилелде киржип турар. Суур бүрүзүнге 3 төлевилелди кылыры көрдүнген. Чижээлээрге, Эрзин суурга «Найырал» деп спортчу шөлге хол болгаш бут бөмбүү ойнаар шөлдер, бичии уруглар ойнаар чайганыыштар тургузар. Ийи дугаарында, «Хоккейжилерге» деп аспортчу шөлүнге хоккей ойнаар болгаш хол, бут бөмбүү ойнаар улуг улуска спортчу шөлдер кылыры көрдүнген. Үш дугаарында, «Спартак» шөлчүгешке бичии чаштар ойнаар элезинниг девискээр болгаш чайганыыштар, узун сандайлар тургузары көрдүнген.
Бай-Даг, Нарын, Мөрен суурларга база Эрзин суурга кылыр дээн үш спортчу шөлдер дег, шак-ла ындыг төлевилелдерни кылыры көрдүнген.
Чурттап турар чериңерни сайзырадырынга киржип, бадылаар үени эрттирбеңер. Шилилгени 14 хардан өрү назылыг кижи бүрүзү za.gorodsreda.ru киргеш, чаңгыс катап соңгуп болур.
ТуваМедиаГрупп
