Тыва үндезин культура төвүнүң директору Игорь Көшкендей өөредилге черлеринге тыва дылдың башкылаашкын айтырыынга хамарыштыр бодалын илереткен. Тыва Республиканың Баштыңының Айыткалында тыва дылды өөредир системаны хөгжүдери чугула дээн даалганы культура ажылдакчызы бедик көдүрлүүшкүн-биле хүлээп алган:
«Тываның Баштыңы Кызыл хоорайның 2 дугаар школазын национал гимназия кылдыр эде адаар дээнинге чөпшээрештим. Дыка шын болгаш дээштиг шиитпир болду. Айыткалдан өөредилге черлеринге тыва дылды хөгжүдер дээнин, бодумда демдеглеп алдым. Турисчи инфраструктура дугайында, бистиң регион Россия Федерациязында безин онзагай чер. Бисте ыдыктыг черлер хөй, культуравыс, төөгүвүс бурунгу, байлак. Шупту чүве өг-бүледен хамааржыр болганда, өг-бүле хамаарылгаларының үндезин тургузуун хөгжүдер дээни Айыткалда чугула черни ээледи. Үнелиг чүүлдер баштай өг-бүлеге хевирлеттинер, оон кожуунунга, дараазында республикага, бүгү чуртка».
Тыва республиканын Чазаанын парлалга албанынын медээзи
