Тываның Баштыңының албан-хүлээлгезин күүседип турар Владислав Ховалыг ажылчын сургакчылаашкыннар үезинде берген даалгалар күүселдезинге хамаарыштыр муниципалитеттерниң ажылын сойгалаан.
Тываның Чазаанга Владислав Ховалыгның башкарылгазы-биле республиканың кожууннарынче үнүүшкүннер үезинде берген даалгаларынга хамаарыштыр хыналда шагы эрткен.
Тываның Чазак Даргазының бирги оралакчызының албан-хүлээлгезин күүседип турар Олег Бады, 220 даалганың бөгүнде 29-зу (13 хуу) күүсеттинген, ам-даа күүселдеде 44 (20 хуу) даалга барын, 10 (5 хуу) хемчег күүсеттинмээнин, 37 (62 хуу) даалганың күүседир хуусаазы элек дээрзин илеткээн.
Муниципалитеттерге берген даалгаларның хөй кезии көдээ ажыл-агыйны, транспорт инфраструктуразын хөгжүдеринче, ол ышкаш чурттакчы чоннуң амыдырал-чуртталгазының байдалын экижидеринче угланганын Олег Бады демдеглээн.
2021 чылдың бирги чартыында үнүүшкүннер үезинде, бюджет албан черлери биле тус чер бот-башкарылга органнарының аразынга 29 сая рубль ажыг түңге 157 керээлер чардынган.
Республиканың чамдык яамылары даалгаларын таваартадып, отчеттарны үезинде бербейн турарында деп, Олег Бады айыткан.
Чижээ, Чөөн-Хемчик кожуунга сургакчылап чорааш, боттарының ажылын кылып шыдавайн турар орук тудугжулары-биле керээни үзерин сүмелээн турган, үе эрткен-даа болза, ол айтырыг ынчаар-ла шиитпирлеттинмээн.
– Шак мындыг чижектерни көргеш, өске кожууннарга база берген даалгалар күүселдезин хынаары чугула апарган. Республиканың муниципалдыг чагыргалары шиитпирлерни үе шаанда үндүрбейн турар.
Чижээ, Чаа-Хөл кожуунда тудуг бригадазы Ак-Дуруг суурда школа тудуун кылып шыдавазы чүгле ийи неделя эрткенде билдинип келген. Шиитпир болгаш хандырылга бар. Түңнелинде чүү билдингенил дээрге, чаңгыс-даа даалга күүсеттинмээн болган. Шыдавас болза, ол-даа, өске-даа объектилерни чүге хүлээнип ап турарыл? – деп, Владислав Ховалыг демдеглээн
Республиканың удуртукчузу хуралдың түңнелинде, муниципалитеттерде ажылдар кайы хире күүсеттинип турарын чогуур яамылар доктаамал хыналдага алырын дааскан.
– Сайыт бүрүзү, үнүүшкүннүң түңнелинде берген даалгаларын бодунуң оралакчыларынга дагзып, ооң үе-шаанда боттанылгазын чедип алыр ужурлуг. Кожуун чагыргаларының удуртукчулары, ылаңгыя социал объектилерге хамааржыр даалгалар күүселдезин дарый чедип алыр болза эки.
ИА ТуваМедиаГрупп
