Самагалдайның уругларның уран чүүл школазының ыры болгаш танцы ансамбли “Эзир-Кара” улустар аразының “Национал өнчү-2021” уран чүүл мөөрей-фестивалының тиилекчизи болган.
Үлегерлиг “Эзир-Кара” ансамбли Чуваш Республиканың найысылалы – Чебоксары хоорайга болган делегей чергелиг XII мөөрей-фестивальдың хары угда 3 шаңналга төлептиг болганнар.
“Ухсуя” культура өргээзиниң сценазынга Тываны төлээлээн бичии самчыларывыс оюн-көргүзүүн бараалгаткаш, жюриниң улуг үнелелин алган. Жюри кежигүннериниң составында сураглыг балетмейстер Алексей Сухарев, Россияның алдарлыг артизи, хореограф, балетмейстер-тургузукчу Игорь Пиворович база Чувашияның улустуң артизи Лидия Попова олар болган.
“Тываның эртинези” болгаш “Эзир-Кара” танцылар I чергениң лауерады, “Хээлиг аяктар” танцы II чергениң лауреады аттың эдилекчизи болган.
Улустар аразының мөөрей-фестивалы чыл санында аңгы-аңгы хоорайларда эрттип турар. Ооң кол сорулгазы – Россия Федерациязының хөй национал чоннарының культуразын, езу-чаңчылдарын сайзырадыры болгаш кадагалаары, бүгү талазы-биле салым-чаяанныг уругларны болгаш улуг кижилерни илередири, аңгы-аңгы регионнар төлээлери чогаадыкчы дуржулгазын солчуру.
ТуваМедиаГрупп