1980 чылдың төнчүзүнде СЭКП Тыва Обкомунуң болгаш Сайыттар чөвүлелиниң хүлээттинген доктаалының шиитпири-биле Тыва Арат Республиканың тургустунганындан бээр 60 чыл оюн тускай демдеглээрин айыткан.
Ол улуг ажылды Обком бюро кежигүннеринге Таңды райкомунга, райкүүскомунга дааскан турган.
Таңды райком болгаш райкүүскомнуң каттышкан хуралынга 60 чылды күш-ажылчы чедиишкиннер-биле уткуур, шупту күштү Кочетов суурнуң сайзыралынче угландырып, Обком партияның доктаалын күүседиринче бүгү чонну эвилелдеп чаагайжыдылга ажылдарын эки чорудуп, часкы тарылганы чедиишкинниг доозуп, мал ажылынга болгаш өске-даа адырларга шалыпчы айларны чарлап, социалистиг чарышты калбартырын дааскан.
Мурнуку одуругга коммунистер, аныяктарның комсомолчу бригадаларын тургузарын негээн.
ТАР-ның 60 чыл оюн демдеглээр хемчеглерде Элегес-Аксындан Кочетов уунче чазаглыг орукту кылыры, Межегей хемни кежир көвүрүгнү тудары, музей комплекизин чаартыры болгаш суурнуң иштинге кудумчуларга асфальт чадары көрдүнген турган.
Суурнуң өөредилге, культура болгаш кадык камгалал адырларынга септелге, чаартылга чорударын шиитпирлээн.
Ол бүгү хемчеглерни күүседири-биле Обком партияның секретары А.И. Ванжага, обкомнуң килдис эргелекчизи А.К. Канзайга, культура сайыды А.С. Серенге дааскан.
Таңды райкомундан 2 дугаар секретарь Н.Ф. Болотовка, райкүүскомдан оралакчы дарга Ф.Л. Благининге болгаш “Коммунизмниң херели” совхозтуң партком секретары Б.К. Балчий-оолга онааган.
Бүгү ажыл-иш 1981 чылда кончуг шалыпкын эгелээн. Музей девискээринге чаа бажыңнарны, тускай мемориалдыг тураскаал стеланы, экспонаттарны чаартыры дээш баар турган. Ооң кадында суурнуң иштинге көскү агитацияны кылып, соцчарыштың түңнелдерин көскү чырыдып, мурнакчыларны шаңнап-мактаар ажыл үргүлчүлээн.
Уланчызын №59 “Шын” солундан номчуп болур.
