Улуг-Хем кожууннуң девискээринге баштайгы өрттер апрель 7-де Иштии-Хем болгаш Арыг-Үзүү сумуларның девискээринге хып үнген. Кожуун чагыргазының, өөредилге болгаш культура эргелелдериниң, Иштии-Хем, Арыг-Үзүү суму чагыргаларының эр ажылдакчылары, эки турачы өртчү дружиналарның кежигүннери демнежип алгаш өрттү өжүрүп, ооң-биле демиселди чоруткан. Апрель 7-де хаттыг хүн болганы-биле өрттү өжүрери дыка берге болган. Хат аайы-биле өрт улам өөскүп тарап, күш четтирбейн турганы-биле өрттерни дүн ортузунга чедир арай деп-ле төндүр өжүрген. Улуг хемчээлдиг хову өрттерин өжүреринге киришкен эр кижилерниң эрес-шудургу чоруун тус черниң чону мактап турар.
Эрткен ийи неделя дургузунда Улуг-Хем кожуунга 27 өрт хып үнген. Оларның үжү бажың чоогунуң өрттери, чээрби дөртү хову-шөлдер өрттери. Хар чаапканы-биле хову черлерге хып турган өрттер өшкен. От-биле оваарымча чок кижилерниң буруузу-биле өрттер ам-даа хып болурунуң айыылы бар.
Өрттерниң хып үнүп турарынга кижилер буруулуг дээрзин Чодураа суурга өрт бадыткаан. Суурнуң чурттакчызы бажың чоогунда богун өрттедип турда, хат хадааш, боктуң оду хат аайы-биле тарааш, чоокта бажыңнарның девискээринче дамчып эгелээн. Өртчүлер дүрген келгеш, суур чоогунда өрттү өжүрген.
Чурттакчылыг черлерни долгандыр дилиндектерни дарый чардырып, өрттен баш удур камгаланырының хемчеглерин алырын суму чагыргаларынга Улуг-Хем кожуун чагыргазының удуртулгазы дааскан.
ТуваМедиаГрупп
